नवी दिल्ली: जर अमेरिकेने भारतीयांना मित्र म्हणून स्वीकारले, तर आपल्याला शांतता आणि समृद्धी लाभेल. जर आपण भारतीयांना दूर ठेवले तर आपल्या सर्वांसाठी ही मोठी अडचणीची गोष्ट ठरेल, अशा शब्दात अमेरिकेतील खासदार रिच मॅककॉर्मिक यांनी इशारेवजा मत व्यक्त केले आहे. पाकिस्तान हा ३० कोटी लोकसंख्येचा देश आहे. पण तो अमेरिकेत गुंतवणूक करताना दिसत नाही. उलटपक्षी भारत केवळ अमेरिकेची भारतात गुंतवणूक करवून घेत नाही, तर तो अमेरिकेत देखील गुंतवणूक करतो. परराष्ट्र धोरणावरून भारत आणि अमेरिकेतील संबंध ताणले गेले असताना खासदार मॅककॉर्मिक यांचे हे मत महत्त्वाचे मानले जात आहे.

"केवळ अमेरिका आणि भारताच्याच नव्हे, तर संपूर्ण जगाच्या स्थिरतेच्या भविष्यासाठी आपल्याला भारतापेक्षा अधिक महत्त्वाचा मित्र मिळणार नाही," असे ते म्हणाले. तसेच, "अर्थव्यवस्था, स्वातंत्र्य आणि लोकांच्या प्रगतीकडे पाहण्याच्या आपल्या दृष्टिकोनातील समानतेकडे" त्यांनी लक्ष वेधले.

सेंटर फॉर स्ट्रॅटेजिक अँड इंटरनॅशनल स्टडीज (CSIS) द्वारे आयोजित एका चर्चेत बोलताना, प्रतिनिधी रिच मॅककॉमिक यांनी जागतिक स्थिरतेसाठी भारताचे महत्त्व अधोरेखित केले. गेल्या काही महिन्यांत वॉशिंग्टनच्या इस्लामाबादशी वाढलेल्या संपर्काबाबत प्रश्नचिन्ह निर्माण होत असताना, अमेरिकेच्या या वरिष्ठ खासदाराने परिस्थिती स्पष्ट करण्याचा प्रयत्न केला. त्यांनी यावर जोर दिला की, भारत हाच इंडो-पॅसिफिक आणि त्यापुढील प्रदेशासाठी अमेरिकेच्या दीर्घकालीन सामरिक दृष्टिकोनाच्या केंद्रस्थानी आहे, पाकिस्तान नाही. टाइम्स ऑफ इंडियाने हे वृत्त दिले आहे. 

ट्रम्प प्रशासनाने भारताच्या रशियन तेल खरेदीवर ५०% इतके मोठे शुल्क लावण्याच्या निर्णयानंतर द्विपक्षीय संबंधांमधील तणावाच्या पार्श्वभूमीवर त्यांचे हे विधान आले आहे. अमेरिकेचे स्थलांतर धोरण आणि गेल्या वर्षी मे महिन्यात भारत-पाकिस्तान संघर्ष संपवल्याचा राष्ट्राध्यक्ष डोनाल्ड ट्रम्प यांचा दावा यांसारख्या मुद्द्यांवरूनही संबंधांमध्ये तणाव निर्माण झाला आहे.

प्रतिनिधी अमी बेरा यांनीही याच संदेशाचा पुनरुच्चार करत म्हटले की, पाकिस्तानसोबतच्या नियमित राजनैतिक संबंधांना धोरणात्मक बदल समजण्याची चूक करू नये. "आम्ही पाकिस्तानसोबत कोणतीही धोरणात्मक भागीदारी करत नाही आहोत. तुम्हाला अमेरिकन कंपन्या पाकिस्तानात अब्जावधी डॉलर्सची गुंतवणूक करताना दिसत नाहीत. हे सर्व भारतातच घडत आहे," असे ते म्हणाले आणि गुंतवणूकदारांना अमेरिकेची प्राधान्ये स्पष्टपणे समजतात, असेही त्यांनी नमूद केले.

भारत स्वतंत्र परराष्ट्र धोरण अवलंबतो हे लक्षात घेऊन मॅककॉर्मिक म्हणाले की, वॉशिंग्टनला नवी दिल्लीचे निर्णय समजतात. पंतप्रधान नरेंद्र मोदींना 'प्रखर राष्ट्रवादी' संबोधून ते म्हणाले, "पंतप्रधान मोदी हे चांगल्या अर्थाने प्रखर राष्ट्रवादी आहेत. ते आपल्या देशाच्या हिताचा विचार करत आहेत. जेव्हा भारत स्वस्त रशियन तेल खरेदी करतो, तेव्हा अमेरिकेला ते आवडत नाही. पण ते आपल्या देशाच्या सर्वोत्तम हितासाठी हे करत आहेत."

वॉशिंग्टन आणि नवी दिल्ली एका व्यापक द्विपक्षीय व्यापार कराराला अंतिम रूप देण्याच्या दिशेने काम करत असताना, या भागीदारीवर पुन्हा एकदा भर दिला जात आहे. भारतातील अमेरिकेचे राजदूत सर्जियो गोर यांनी सांगितले आहे की, दोन्ही देश एक नवीन करार पूर्ण करण्यासाठी सक्रियपणे प्रयत्न करत आहेत.